viernes, 13 de julio de 2012

Conxusta al rodiu'l baille nel folk asturianu


Como yá sabéis, a les 4 hores d'esta tarde vamos entamar a refacer tradiciones. Amás de les esposiciones d'Ambás, Octavio Trapiella, Xuan Nel Expósito, Dolfu R. Fernández y Rubén Bada, tamién vamos entamar un alderique pa discutir y reflexonar al rodiu'l baille na música folk, nel que tais toos/es convidaos/es a participar. Si bien el desendolcu de los conteníos de la conxusta va ser improvisáu –en función de les aportaciones de los que vos arriméis al prau de la fiesta– proponemos a priori les siguientes llínies de debate:

    - El paradigma del baille nel folk, ¿de verdá da pa tanto? Fortaleces y debilidades.

    - Los grupos de baille ¿potencial o llastre pal folk baillable? Tradición exhibía VS Tradición vivía.

    - ¿Qué podemos facer pa da-y vida al baille? Estratexes y formatos pa crear un nichu de mercáu.

    - ¿Cómo tocar pal baille? Del xestu corporal a la interpretación musical.


Déxovos una pequeña introducción al cursín/conxusta:


Ya Platón dicía aquello de que'l cuerpu ye la cárcel del alma y ye que, en xeneral, el cuerpu siempres foi daqué poco valorao na tradición occidental. Pensáu davezu n'oposición a lo intelectual, la distinción cuerpu/alma tien una gran importancia simbólica en tolos ámbitos de la nuesa forma d'entender la realidá. Evidentemente, como ya dixera Lacan y otros munchos, onde hai distinción hai xerarquía. Mesmo, la distinción cuerpu/alma ta vencellada a una ordenación simbólica que, más alló de los debates especulativos, atraviesa bien de dimensiones de la nuesa realidá, como ye'l casu del xéneru, la clas social, la etnia, la nacionalidá, l'arte, la cultura popular y, por supuestu, la música.

La cuestión del cuerpu y la música ye daqué que se vien trabayando na musicoloxía especialmente dende los años 80, sobre too nos ámbitos de la música académica (clásica) y la nomada popular music. En relación a la música folk fecha n'Asturies y al cursín/conxusta d'esta tarde, cabría dicir –a mou d'introducción– que los modelos estéticos que dominaron esta música nes caberes décades –el celtismu principalmente– apurrieron, en xeneral, una forma d'entender la música fuertemente dixebrada de lo corporal. Si bien esta mena de modernizar de la música tradicional truxo bien de coses coses granibles, tamién ye cierto que l'impactu del conceutu de la jam session, una práctica musical deslligada del baille, contribuyó al desendolcu d'una estética onde espoxigaron parámetros musicales tradicionalmente vencellaos al ámbitu del intelectu (el dominiu téunicu, la perfección formal, repertorios de calter instrumental, el virtuosismu, etc.), frente a otros asociaos a lo corporal, que nun foron tan valoraos, como ye'l casu del baille y de la danza. 

Como ye bien sabío, una bona parte de la música tradicional asturiana siempres tuvo mui vencellada al baille; poro, ún de los oxetivos d'esta actividá ye'l de entamar una reflexón y aición nel camín repensar y reinventar les rellaciones de la música folk pa col baille. Entendemos que'l disfrute estéticu musical vencelláu a la corporalidá ye dalgo con mayor potencial d'identificación popular que la simple escucha, ya de por sí, un tanto elitista. Asina, el reencuentru del folk col baille podría ser una posible vía a esplorar pa esti movimientu cultural y musical, que nagua por volver a ser aire y lluz d'un tiempu meyor.

¡¡¡Qu'entame la folixa!!!
Licencia de Creative Commons
Conxusta al rodiu'l baille nel folk asturianu by Llorián García Flórez is licensed under a Creative Commons Reconocimiento-NoComercial-SinObraDerivada 3.0 Unported License.

domingo, 8 de julio de 2012

Más información de la folixa

Yá ta montada la barraca!!! Esti sábadu foi la corderada, la primer actividá de les fiestes de Caldones d'esti añu. Los asadores de la nuesa collación son famosos y preciaos na contorna'l valle'l Muriel. Vamos tener suerte nesti sen, pal día de Refaciendo Tradiciones dalgunos d'estos asadores van tar tola nueche del vienres 13 al pie la parrilla. Pa cenar tamién va a haber comida casero de toa triba: empanades, bollos preñaos, adobu, etc. ¿vas perdételo?

Dexando un poco de llau la siempre socorrida gastronomía, una de les novedades d'esta folixa ye la supresión del escenariu na candonga de pela nueche, tal y como se facía nes romeríes d'antañu. Entendemos esta opción como una forma d'apostar por formatos más cercanos y dialóxicos ente músicos y públicu. Mesmo, si bien el Turcipié va tar animando d'un entamu, tamién va a haber escenariu abiertu pa toes aquelles persones que-yos preste compartir la folixa con nós echando un cantarín, tocando la pandereta o cualisquier otru instrumentu.

Tamién vamos habilitar una zona'l prau –la pumarada que veis na semeya– p'acampada llibre, evitando d'esta miente los problemes derivaos de l'entemecer sidre y conducidera.

Caldones ye una collación d'una fonda tradición sidrero (más de la metá de tol sidre que se produz n'Asturies sal de los llagares qu'hai nel nuesu valle); poro, la comisión de fiestes de Caldones siempre tien un gran procuru por ufiertar el meyor sidre que seya posible. El llagar de Canal –asitiáu en Caldones– ye'l proveedor habitual, del que probamos añalmente tolos toneles y seleccionamos el que más nos presta de cada collecha pa beber los díes de la fiesta.
Sabéi tamién qu'esta romería finánciase fundamentalmente gracies a les perres que da la xente'l pueblu y de los cuartos que se saquen na barra los díes de fiesta. Poro, animámosvos a facer gastu na barraca y, sobre too, a NUN TRAYER EL SIDRE DE FUERA.


Licencia de Creative Commons
Más información de la folixa by Llorián García Flórez is licensed under a Creative Commons Reconocimiento-NoComercial-SinObraDerivada 3.0 España License.

lunes, 2 de julio de 2012

Presentación Refaciendo Tradiciones

Refaciendo Tradiciones ye una iniciativa organizada dende la Comisión de Fiestes «La Rebollada», entamadora de les Fiestes del Carme de Caldones (Xixón), y que cunta col sofitu de l'Asociación de Vecinos «El Carbayu», tamién de Caldones. Esta primera edición va facese'l prósimu vienres 13 de xunetu nel prau la fiesta, a la que tais toes y toos convidaes/os.

L'enquiz de Refaciendo Tradiciones ye'l de promover la reflexón, aición y disfrute alrodiu la música y la cultura tradicional asturiana. Nesti sen, el desendolcu d'actividades comprometíes, nun ambiente festivu y d'inspiración llocal sedrán les principales ferramientes nes que nos sofitaremos p'algamar los oxetivos propuestos.

Na edición d'esti añu toles actividades van empobinase al rodiu de dos temátiques diferenciaes pero complementaries. Per un llau, el baille tradicional na música asturiana y, per otru, la tradición de la foguera y l'arbolón nes fiestes del Carme de Caldones.

En relación a la primer estaya van facese les siguientes actividades: un taller de baille tradicional, impartíu por Ramsés Ilesies; un cursín y conxusta al rodiu la música folk y el baille tradicional, nel que participarán Xosé Antón Fernández Martínez «Ambás», Octavio Trapiella, Xuan Nel Expósito, Rubén Bada y Dolfu R. Fernández; y un baille entamáu pola bandina L'Andecha Turcipié –tamién con escenariu abiertu–.

D'otra miente, vamos volver a facer la foguera y plantar l'arbolón, un vezu que, al igual que n'otros llugares de la contorna, dexó de facese a finales del sieglu XIX. El conocimientu d'esta costume ye dalgo que debemos a José Rodríguez Acebal «Joselín», vecín y informante del barriu de Robleo trístemente fináu en 2007 a los 77 años d'edá, del que, gracies a los sos testimonios, deprendimos tolo que sabemos al rodiu d'esta tradición en Caldones. Poro, el pregón sobre la foguera y l'arbolón que fadrá l'antropólogu Roberto González-Quevedo tará dedicáu a la so memoria.

Nos prósimos díes diremos dando anuncia de más detalles del I Refaciendo Tradiciones.



Licencia Creative Commons
Presentación Refaciendo Tradiciones por Llorián García Flórez se encuentra bajo una Licencia Creative Commons Atribución-NoComercial-SinDerivadas 3.0 Unported.