viernes, 13 de julio de 2012

Conxusta al rodiu'l baille nel folk asturianu


Como yá sabéis, a les 4 hores d'esta tarde vamos entamar a refacer tradiciones. Amás de les esposiciones d'Ambás, Octavio Trapiella, Xuan Nel Expósito, Dolfu R. Fernández y Rubén Bada, tamién vamos entamar un alderique pa discutir y reflexonar al rodiu'l baille na música folk, nel que tais toos/es convidaos/es a participar. Si bien el desendolcu de los conteníos de la conxusta va ser improvisáu –en función de les aportaciones de los que vos arriméis al prau de la fiesta– proponemos a priori les siguientes llínies de debate:

    - El paradigma del baille nel folk, ¿de verdá da pa tanto? Fortaleces y debilidades.

    - Los grupos de baille ¿potencial o llastre pal folk baillable? Tradición exhibía VS Tradición vivía.

    - ¿Qué podemos facer pa da-y vida al baille? Estratexes y formatos pa crear un nichu de mercáu.

    - ¿Cómo tocar pal baille? Del xestu corporal a la interpretación musical.


Déxovos una pequeña introducción al cursín/conxusta:


Ya Platón dicía aquello de que'l cuerpu ye la cárcel del alma y ye que, en xeneral, el cuerpu siempres foi daqué poco valorao na tradición occidental. Pensáu davezu n'oposición a lo intelectual, la distinción cuerpu/alma tien una gran importancia simbólica en tolos ámbitos de la nuesa forma d'entender la realidá. Evidentemente, como ya dixera Lacan y otros munchos, onde hai distinción hai xerarquía. Mesmo, la distinción cuerpu/alma ta vencellada a una ordenación simbólica que, más alló de los debates especulativos, atraviesa bien de dimensiones de la nuesa realidá, como ye'l casu del xéneru, la clas social, la etnia, la nacionalidá, l'arte, la cultura popular y, por supuestu, la música.

La cuestión del cuerpu y la música ye daqué que se vien trabayando na musicoloxía especialmente dende los años 80, sobre too nos ámbitos de la música académica (clásica) y la nomada popular music. En relación a la música folk fecha n'Asturies y al cursín/conxusta d'esta tarde, cabría dicir –a mou d'introducción– que los modelos estéticos que dominaron esta música nes caberes décades –el celtismu principalmente– apurrieron, en xeneral, una forma d'entender la música fuertemente dixebrada de lo corporal. Si bien esta mena de modernizar de la música tradicional truxo bien de coses coses granibles, tamién ye cierto que l'impactu del conceutu de la jam session, una práctica musical deslligada del baille, contribuyó al desendolcu d'una estética onde espoxigaron parámetros musicales tradicionalmente vencellaos al ámbitu del intelectu (el dominiu téunicu, la perfección formal, repertorios de calter instrumental, el virtuosismu, etc.), frente a otros asociaos a lo corporal, que nun foron tan valoraos, como ye'l casu del baille y de la danza. 

Como ye bien sabío, una bona parte de la música tradicional asturiana siempres tuvo mui vencellada al baille; poro, ún de los oxetivos d'esta actividá ye'l de entamar una reflexón y aición nel camín repensar y reinventar les rellaciones de la música folk pa col baille. Entendemos que'l disfrute estéticu musical vencelláu a la corporalidá ye dalgo con mayor potencial d'identificación popular que la simple escucha, ya de por sí, un tanto elitista. Asina, el reencuentru del folk col baille podría ser una posible vía a esplorar pa esti movimientu cultural y musical, que nagua por volver a ser aire y lluz d'un tiempu meyor.

¡¡¡Qu'entame la folixa!!!
Licencia de Creative Commons
Conxusta al rodiu'l baille nel folk asturianu by Llorián García Flórez is licensed under a Creative Commons Reconocimiento-NoComercial-SinObraDerivada 3.0 Unported License.

No hay comentarios:

Publicar un comentario